State Day of Prayer-a tel turin BJP sáwm

BJP, Mizoram Pradesh chuan nimin khan Aizawla an pisaah State Day of Prayer hruaitute nen hun an hmangho. State Day of Prayer hruaitute chuan, February 20, 2025-a Lammuala hun hman tura a tam thei ang ber tel turin BJP an sáwm.

Hun hmanhonaah hian State Day of Prayer team aiawh Rev. Lalrinmawia'n thu a sawi a; "BJP-te'n State Day of Prayer team-te ṭha taka min dawnsawnnaah kan lawm hle. BJP hotute bakah member a tam thei ang ber State Day of Prayer hun min hmanpui turin kan sawm che u a ni," a ti.

BJP Mizoram president Vanlalhmuaka chuan, kohhran bik awm lo leh party lam sawi loa ram leh hnam damna tura State Day of Prayer buatsaih a ni tur chu lawmawm a tih thu a sawi a, "BJP chuan kan din chhan Mizoram leh hnam tan a nih avangin, chumi kan mission hlawhtlinna bul chu Pathian chauh a ni. He ṭawngṭaina hun pawimawh takah hian BJP a tam thei ang ber kal turin kan inbuatsaih dawn," a ti a; a, ram leh hnam damna turin kawng hrang hranga hmalak a pawimawh thu a sawi.