ṬKP-in rilru hrisel chungchang inzirtir an rêl

Mizoram Ṭhalai Kristian Pawl (MṬKP) inkhawmpui, Lunglawna neih chu nizan khan a ṭiak. Inkhawmpuiah hian, rilru hrisel chungchang zirtirna neih an rêl bakah, MṬKP inkhawmpui dâwltu ṭanpuina atana member tinin kum tina Rs 20 an thawh ṭhin chu Rs 50-ah tihpun an rél.

MṬKP inkhawmpuiah hian February 14, Zirtawpni chhun khan Lunglawn BCM biak-inah MṬKP rorel vawi 71-na neih a ni a, president Upa R Lalrochama’n a kaihruai. Rorel palai 588 an tel a, unit aiawhin mi 367, bial aiawhin mi 163 leh MṬKP Executive Committee member 31 an ni.

Rorelah hian 'Rilru hrisel chungchang zirtirna neih ni se,' an ti a; MṬKP inkhawmpui dâwltu ṭanpuina member tinah kum tin Rs 50 khawn ṭhin ni rawh se," an ti a, kum 2018 aṭanga kum tin Rs 20 an khawm chu Rs 50-ah an tipung.

Ram tana chaw nghei ṭawngṭai an rél a; "ṬKP-te'n thlarau bo man beihpui thlak ni se," an ti. BCM pandal structure puala unit tin fehchhuah neih te, MṬKP Youth Centre puala sum tuak te, website siamte an rél. Rorel inkhawmah hian kum 2025-2028 chhunga MṬKP office bearer turte thlan a ni bawk.

Report-a a lan danin, ṬKP pastor bial 92 leh unit 447 a awm a, member 50,364 awm mekin, mipa 30,562 leh hmeichhia 19,802 an ni. MṬKP-in kum 2024-2025 chhungin Rs 61,21,067 an hmu a, Rs 54,27,042 an hmang.

MṬKP kum 2024 rorèl leh 2025 rorèl inkarah ṬKP member 158 an thi a, mipa 139 leh hmeichhia 19 an ni a; innei tuak 618 awmin, chu'ng zinga tuak 401 chu kohhran dan puitlinga innei an ni.