Valentines Day pual thisen pek

Association for Volun-tary Blood Donation (AVBD) leh Mizoram State AIDS Control Society (MSACS) chuan nimin khan Mizoram hmun hrang hrangah Valentines Day pualin thisen pek an buatsaih a, Mizoram pumah thisen unit 663 pek a ni.

Valentine's Day Blood Donation Camp-a khuallian Dr Eric Zomawia, NHM mission director chuan, a thlawna thisen pekah Mizoram chu India rama a ṭha pawl a nih thu sawiin, Mizo ṭhalai tlawmngaite vang a nih thu a sawi a; thisen pek uar zel tura ṭhalaite sawmin, "Thisen kan pek zel theih nan kan hriselna ngai pawimawh ila. Hriselna ṭha kan neih theih nan kein kal tam ila, zuk leh hmuam leh ruihhlo lakah i fihlim ang u," a ti.

AVBD president C Lalnunnema pawhin thu sawiin, financial year kal meka AVBD-in voluntary blood donation target a siam chu 92% a nih thu a sawi a, "Mizo ṭhalaite tlawmngaihna leh ṭhahnemngaihna avangin kan target hi kan tlin ngei kan beisei," tiin, thisen pe zel turin ṭhalaite a fuih.

V Day Blood Donation Camp hi nilengin neih a ni a, thisen pe apiangte hnenah rose pek a ni. Zaithiam engemaw zatin hun an hmang.

AVBD general secretary Lalrinkima tarlan danin, Valentine's Day puala thisen pek hi kum 2010 khan ṭan a ni a, kum tin buatsaih zui niin, kumin hi vawi 16-na a ni. V-Day puala thisen pekah hian Mizoram pumah 2010-2024 chhung khan thisen unit 10,958 pek a ni a, kumina mi nen unit 11,621 pek tawh a ni.

AVBD chuan V Day puala thisen pek an huaihawt theihna tura sum leh paia ṭanpuitute zawng zawng chungah an lawm thu an tarlang.

V DAY 2025-A THISEN PEK DAN

Civil Hospital, Aizawl - Unit 304

ZMCH - Unit 86

Synod Hospital - Unit 12

Lunglei - Unit 101

Champhai - Unit 42

Kolasib - Unit 78

Siaha - Unit 40