Hnahthial district-a sawhthing lei hmasakah qtl 5,250 lei dawn

Hnahthial District Agriculture Marketing Committee (DAMC) chuan nimin khan an chairman Rita Lalnunmawii Pachuau, bawrhsap kaihhruaiin Hnahthial district-a sawhthing lei dan tur an sawiho. A hmasa ber atan Hnahthial district-ah sawhthing quintal 5,250 lei tur a nih thu tarlan a ni.

Ṭhutkhawma tarlan danin, Hnahthial district-ah a hmasa ber atan sawhthing qtl 5,250 lei tur a ni dawn a; Hnahthial district-a secondary collection centre hrang hrang vil tur inruat a ni. Collection centre tinah sawhthing dahna tur buara ip 1,000 ṭheuh sem chhuah ni se, February 18, 2025-ah Hnahthial district-a collection centre hrang hrang manager leh accountant-te tan sensitization programme buatsaih ni se, an ti.

Rita Lalnunmawii Pachuau chuan, rei lo teah sorkarin kut hnathawktute sawhthing a lei dawn thu a sawi a, "Hemi atan hian DAMC pawh theihtawp chhuaha kan inbuatsaih a ṭul," a ti. Mizoram Agricultural Marketing Board (MAMB) coordinator Dr Malsawmdawngliana'n thu a sawi bawk.