International Condom Day hman a ni

Nimin kha International Condom Day a ni a, Mizoram State AIDS Control Society, AIDS Healthcare Foundation India Cares leh Samaritan Society of Mizoram ten Millennium Centre chungzawlah an hmang. Thupui chu 'Just use it' tih a ni.

Condom Day hmannaah hian MSACS project director Dr Jane R Ralte chuan, Mizorama mipat hmeichhiatna aṭanga natna inkai chhawn theih (sexually transmitted infection)-te leh HIV darh zel tur venna tura beihpui thlakna 'Generation C Campaign' leh 'Love Brigade 2.0 Campaign' a hawng.

Dr Jane R Ralte chuan, HIV kai tam lamah Mizoram chu India ramah pakhatna a nih thu sawiin, "HIV lakah hian inven theih a ni. Kristian ram kan ni a, condom kan sawi duh lo ṭhin. Condom kan sawi hian sex promote-naa ngaite an awm ṭhin a, mahse, kan promote lo a, insûm thei ngang lote tan natna hlauhawm laka invenna tur hmanrua kan inzirtir zawk a ni," a ti.

MSACS Project Director chuan, mipat hmeichhiatnaah insûm thei nih tum turin ṭhalaite a fuih a, insûm thei lo tan condom hman nachang hriat a pawimawh thu a sawi. AIDS HealthCare Foundation India Cares program director Dr V Sam Prasad leh AHF India Cares ambassador Manvendra Singh Gohil ten thu an sawi bawk.

Condom Day hmannaah hian a duh apiang tan a thlawna HIV vei leh vei loh enfiahna hun hawn a ni a; kal khawmte'n hnenah condom hman a pawimawhna inziahna lehkha leh condom sem a ni.

Love Brigade 2.0 Campaign-ah hian Two Wheelers Taxi Association nen ṭang dunin two-wheeler taxi driver eng emaw zat hnenah condom jacket sem a ni a; Aizawla Auto Drivers Association hnenah HIV chungchang zirtirna hmanrua dahna tur seat cover sem tum a ni bawk.

Mizoramah a mamawhte'n awlsam zawka a thlawna an lak theih nan hmun 300-ah condom dah tum a ni a; damdawi dawr, damdawi-in, kiosk, Aizawl khawpui hmun hrang hranga toilet-ah leh restaurant-ahte dah tum a ni.

International Condom Day hi HIV darh zel tur ven nan AIDS HealthCare Foundation, USA chuan kum 2009 aṭangin February 13-ah an hmang ṭhin a; mipat hmeichhiatna aṭanga natna inkai chhâwn theihte leh HIV laka inven nana condom hman pawimawhna inzirtirna atan hman a ni.