AEP zirtirtu training sawiho

Lunglei District AIDS Prevention and Control Committee (DAPCC) chu an chairman Navneet Mann, bawrhsap hoin nimin khan an ṭhukhawm a, Mizoram State AIDS Control Society (MSACS) leh School Education department thawh dunnaa mimal (private) sikula HIV/AIDS darh zel tur leh ruihhlo hman sualna venna tur Adolescent Education Programme (AEP)-a zirtirtute training buatsaih dan tur an ngaihtuah.

AEP hnuaiah hian private school-a zirtirtu pahnih (mipa leh hmeichhia) thlan chhuahte chu training neihpui an ni dawn a; chu'ng zirtirtu training zote chuan an zirlaite chu HIV/AIDS leh ruihhlo laka an fihlim theih nan anmahni sikul ṭheuhah hma lain an zirtir dawn a ni.

Training-ah hian Lunglei district-a private school 23 leh Hnahthial district-a private school 14, a vaiin sikul 37-a zirtirtu 74 an tel dawn a; March 4-6, 2025 chhungin training buatsaih tum a ni.