MṬKP Inkhawmpui 2025 ṭan a ni

Nizan khan Lunglawn Muala pandal sak, Krista Pasalṭhate Rûnah Mizoram Ṭhalai Kristian Pawl (MṬKP) inkhawmpui ṭan a ni a, February 16, Pathianni zanah a ṭiak ang.

MṬKP inkhawmpuia tel tur hian Mizoram hmun hrang hrang aṭangin ṬKP member-te'n nimin khan Lunglawn an pan a, palai ṭhahnem tak an thleng tawh. Inkhawmpui thupui chu ‘Pathian hnaih rawh u’ tih a ni a, speaker hrang hrangin an sawi ang.

Inkhawmpui thlengtu Lunglawn Pastor Bial chuan inkhawmpui atan budget Rs 70,00,000 an ruahman a, chuta ṭanga Rs 42,00,000 chu MṬKP-in ṬKP member-te thawh khawm aṭanga a tum a ni. Inkhawmpui neihna pandal 'Krista Pasalṭhate Rûn' hi a dung ft. 230 leh a vâng ft. 184 a ni.

Tarlan tawh angin, kum 2019-a Tlabunga MṬKP rorel angin, kumin MṬKP inkhawmpui aṭang hian inkhawmpui palaite aṭangin registration fee mi pakhatah Rs 50 zel lak a ni dawn a; registration fee lak hi inkhawmpui dâwltu lam senso hautak lutuk phuhrûkna atan leh, sorkar leh hmun dang aṭanga sum beisei loa mahni intuamhlâwm tumna leh duhna avanga an tih a ni.

MṬKP inkhawmpui pualin ṬKP member tinin kum 2015 aṭang khan kum tin Rs 10 an thawh ṭhin a, kum thum an kalpui hnuah pawisa thawh zat tipungin, kum 2018 aṭangin member tinin kum tin Rs 20 an thawh ṭhin bawk.

ṬKP-ah hian tun dinhmunah unit 447 awmin, member 50,364 an awm mek a, mipa 30,562 leh hmeichhia 19,802 an ni a, nikum aiin member 1,571-in an pung. Kum 2024-a MṬKP rorel hnuah ṬKP member 158 an thi a, mipa 139 leh hmeichhia 19 an ni. Dan puitlinga innei tuak 401 leh dan têa innei tuak 235 an awm.