Society leh SCC-te inkaihhruaina zirho

Lunglei District Agricultural Marketing Committee (DAMC) chuan nimin khan Lungleia Horticulture conference hall-ah thlai thar lei leh hralh chungchanga society leh secondary collection centre (SCC)-te inkaihhruaina zirhona, 'Standard Operating Procedures for Societies & SCCs under Agricultural Market Assurance Scheme in Mizoram' an buatsaih.

Zirhona hmanpuitu Lunglei additional DC Rochuangkimi Khenglawt chuan, thlai lei chungchangah line department-te'n secondary collection centre buaipui tur an ruat tawh tih a sawi a, "A leitu lam leh hralhtu lamte felfai tak leh fimkhur taka an indawr theih nan society-te chu an pawimawh dawn hle. Bana Kaih policy hlawhtlinna chu department-a thawktute ai mahin, a taka hmang ṭangkaitute kutah a innghat tam dawn a ni," a ti a, society-te chu theihtawp chhuah turin a chah.

DAMC member secretary VL Hmangaihchhunga, Lunglei district agriculture officer chuan, Lunglei district-ah thlai hralh tur chhêk khawlna (secondary collection centre) pariat a awm thu te, thlai leitu turte pawh an inpeih tawh thu te, SCC chu tlawh chhuah vek a nih tawh thu leh, a viltu tur pawh dah a nih tawh thu a sawi.

Zirhonaah hian Mizoram Agricultural Marketing Board (MAMB) co-opted member Lalnunpuia (master trainer) chuan thlai thar hralh dan tura sorkarin ruahmanna a siam dan leh a kalpui dan tur te, SCC chungchanga hriat tur pawimawh hrang hrangte a zirtir a; zawhna leh chhanna bakah, sawihona hun hman a ni.