Dragonfruit kg. 1 Rs 130-in lei dawn

Mizoram Dragonfruit Farmers' Association (MIDFA) Sub-Headquarters Lunglei leh Ṭawitlang Farmers Producers Company chuan nimin khan Lungleia Horticulture office-ah kumina dragonfruit lei leh hralhah thawkho turin inremna, memorandum of understanding (MoU) an ziak. Inremna angin dragonfruit kg. khat Rs 130-in lei/hralh a ni dawn.

MoU-ah hian Lunglei district-a thar dragonfruit ṭha chu MIDFA Sub-Hqrs, Lunglei hnen aṭangin Ṭawi tlang Farmers Producers Company-in kg. khat Rs 130-in an lei dawn a; inremna hian November 30, 2025 thleng a huam.

Dragonfruit lei turte chu grade ṭhen a ni dawn lo a, mahse, a pum hmin ṭha leh him chauh an lei dawn thung. Dragonfruit lak khawm, thliar fel, bûk leh hralhna hmun atan Mualṭhuam North, Pukpui leh Lunglei DHO pisa ruat a ni.

Inremna thuthlungah hian MIDFA Sub-Hqrs Lunglei aiawhin president R Lalthanmawia leh secretary Lalramengmawia ten hming an ziak a, Ṭawitlang Farmers Producers Company aiawhin chief executive officer Lalthlamuana Sailo leh general manager Vanlalṭanpuia te'n hming an ziah. Hriatpuituah Lunglei DHO B Lalzarzova leh commerce & industries officer F Lalsawmliana te an ṭang.