KHAWTHLIR

Changzawlah in kâng

Nimin zing dar 3 vel khan Changzawl khuaa Lalchhana te chenna in Assam type chu a kâng a, bungraw chuh hman lohin a kâng ral. Thu dawn danin, inah hian Lalchhana te nupa leh an fate pathum an cheng a, an ṭhenawmte'n an kaihthawh hnuah an insaseng hman. In kan chhan hriat a ni lo a, in bakah an kawta dah bike leh Bolero camper a kâng chhia. Nimin khan khawtlang mipui in sain an hnatlang nghal a, an ṭhenawm khuate'n an pui bawk.

Lak luh khap

Mamit district magistrate K Laltlawmlova chuan hriattirna chhuahin, Mamit district-ah Mizoram pawn aṭang leh Mizorama ASF lenna hmun aṭanga vawk, vawksa rêp leh vawksa aṭanga siam lak luh khap a nih thu a puang. Ran damlo leh hrisel lo hralh leh zawrh khap a nih thu te, vawk thite chu chinai thi/bleaching powder nen thûk taka phûm tur a nih thu te, vawk thi neitute chu AH&Vety department-ah inhriattir zel tur a nih thute a tarlang. Thupek zawm lote chu BNS 2023 Section 223 hmanga hrem theih an ni.

Lawipu LC thlan

Lawipu, Aizawlah local council inthlan tura candidate a thih avangin vawiin hian inthlan buatsaih a ni dawn. State Election Commission-in hriattirna a chhuah angin, Lawipu LC thlannaah hian zing dar 7 aṭanga tlai dar 4 thleng vote thlak hun hawn a ni ang.

AR-in beer man

Assam Rifles chuan nimin khan Champhai Zote leh Bulfek inkarah Myanmar lam aṭanga lak luh ram dang beer báwm (case) 20 an man a, Champhaia Customs hnenah an hlan. Foreign beer hi ramhnuaia thuhrûk an man a ni.

Lalnutuiah inthlang

Lunglei district-a Lalnutui khuaah nimin khan village council inthlan tluang taka neih a ni. Lalnutui khuaah hian February 12, 2025-a VC inthlan tura MNF candidate pakhat tun hnaiah a thi a, candidate list tihchhuah tawh hnu a nih avangin candidate thi aiawh tur thlaktu ruat theih a ni tawh lo. Hei vang hian State Election Commission chuan inthlan hun sawnin, nimin khan inthlan buatsaih a ni ta a ni.