KHAWTHLIR

MP Vena'n thlen

February 10, Thawhṭannia Parliament Committee Room-a Parliamentary Committee on Railway ṭhutkhawmnaah Rajya Sabha MP K Vanlalvena chuan Bairabi leh Sairang inkara rél kawng siam mek chu zawh a nih dawn hnaih thu te, rel kawng chu Myanmar ramri thlenga siam ngei ṭha a tih thu te, economic hmasawnna atan leh ram venhimna atana thil pawimawh a nih thute a sawi. Railways hnuaia hna lak thar turah Aizawlah exam centre dah ve a ṭul thute a thlen bawk.

AR-in meth man

Assam Rifles sipaite chuan February 9, 2025 khan Zokhawthara Vawkte Kàiah methamphetamine kg. 57.91 an man a, Zokhawthar Police Station-ah an hlân. AR chuan, methamphetamine an man chu cheng vbc 173.73 hû a ni a, a neitute an tlanchhe hman niin an tarlang.

MSU din champha

Mizo Students Union (MSU) chuan nimin khan an din champha vawi 24-na IPR auditorium-ah an lawm a, Higher & Technical Education Education secretary H Lalengmawia'n a hmanpui. H Lalengmawia chuan, harsatna leh manganna avanga beidawng ngai lo tura zirlaite fuihin, Mizo zingah central service officer an tlem tawh avangin ṭan la turin zirlaite a chah. MSU president B Lalkhawngaihzuala chuan, MSU-in a tum ber chu zirlaite ṭanpui a nih thu a sawi.

END-in opium man

Excise & Narcotics department chuan February 11, Thawhlehni tlai khan Champhai district-a Zote leh Myanmar rama Bulfek inkar kawngah opium gram 945 leh a neitua puh Beirahnei (38) s/o Zaki, New Colony, Siaha leh Chinsianmung (25) s/o Paukhantuang, Bulfek, Myanmar nia inchhalte an man. A hnuah he thila inhnamhnawiha hriat Chinsiandawni (40) s/o Chinkapthanga (L), Champhai Bethel Veng nia inchhâl an man leh bawk. Opium hi Tahan, Myanmar aṭanga lak a ni a, Siahaa hralh tum a ni.