Police leh Excise-te ṭang dunin Lungleiah silai leh a mu an man

Lunglei Police leh Excise & Narcotics department ṭang dun chuan nimin zing dar 2:30 vel khan Lungleiah silai, silai mu, magazine, pawisa leh thil dang eng emaw zat an man.

Nimina local council leh village council inthlan neih zawh tâk kha boruak muanawm tak hnuaia neih a nih theihna atan Lunglei Police leh Excise & Narcotics-te hian hun eng emaw chen beihpui an thlak a; nimin zing khan Thenzawl lam aṭanga Lunglei pan Alto car MZ-01 S-3210 aṭangin Lunglei Bazar Veng huam chhungah ralthuam leh thil dangte hi an man.

Alto car aṭang hian AK-47 rifle pahnih, M4 Carbine panga, magazine 20, silaimu 7.62mm 404 leh 5.56mm 4,675, pawisa Rs 49,550, ID card, ATM card, SIM card leh mobile phone panga an man bawk.

Car-a chuang mi pathum - Roni Chakma (45) s/o Kali Kumar Chakma, Dhalai, Tripura; Anirban Chakma (34) s/o Badhi Chakma, Adubangasora, Lawngtlai district leh Ribeng (24) s/o Nagendra Lal, Tipperaghat, Lunglei district-te pawh an man nghal a; Lunglei Police Station-ah thubuai ziah luh a ni.

Silai leh thil dang mante hi Bangladesh lama kalpui tur nia hriat a ni a; Lunglei police-te chuan silai leh thil dang man chungchangah hian a kaihhnawih dang awm theite an chhui zui zel a ni.