Serchhip District Hospital sak mek endik

Mizoram State Project Monitoring Committee (MSPMC) chuan nimin khan an secretary Lalthanzuala Ralte kaihhruaiin Serchhipa GNM School sak tawh leh khum 100 awmna tur Serchhip District Hospital sak mek an endik.

MSPMC team hian Serchhip District Medical Superintendent pisa-a thawkte an kâwm a; Lalthanzuala Ralte chuan, sorkarin sum tam tak senga project a kalpui mek leh hmalak tawhnate chu a nih tur angin puitling ngei se an duh thu sawiin, "Project tam tak hlawhchham leh zawh a nih hnu lawka chhe leh mai ṭhin, hman zui tlak lohte a awm," a ti.

Serchhip District Hospital satute chu a nih tur ang taka hun bituk chhunga zo tur leh neitu rilru pua thawk turin an chah.

MSPMC team chuan GNM School building dinhmun leh mamawhte enin, hman ṭangkai theih tura mamawhte an enfiah a; ṭul leh pawimawhte sawiho nghal a ni.

Khum 100 awmna tura ruahman Serchhip District Hospital hi Power Grid Corporation of India Ltd (PGCIL) CSR fund cheng vbc. 21 hmanga sak tura ruahman a ni a; contractor Zamzo Engineering Construction & Consultancy-in March 24, 2024 khan hna thawk ṭanin, ban khur 12-ah ban pariat an phun tawh.

General Nursing and Midwifery (GNM) School, Serchhip tur chu Ministry of Health & Family Welfare hnuaia Centrally Sponsored Scheme of Upgradation/Strengthening of Nursing Services (Establishment of New Nursing Schools ANM/GNM) aṭanga kum 2010-11 a sum hmuh Rs 6,75,75,000 hmanga sak a ni. Administrative cum teaching building leh hostel building April 1, 2013 - January 3, 2018 chhungin sak a ni a, luah loha hun rei tak a awm tawh avangin building hi a chhe leh nual tawh.