Champhaiah Road Safety Month hawng

Champhai District Road Safety Committee chairman VL Remliana, district bawrhsap chuan nimin khan Champhai New Market (CHANEM)-ah Road Safety Month a hawng.

Inkhawmah hian Road Safety Month thutiam sawi rual a ni a; Champhai deputy SP Dennis Vanlallura'n lirthei kaihhnawih dan hrang hrang a sawifiah. Zoram Drivers Union aiawhin K Lalrinmawia'n lirthei khalhtute mawhphurhna hrang hrang a sawi bawk.

Bawrhsap VL Remliana chuan, kum tin Road Safety Week/Month hman ṭhin a nih thu sawiin, a hlawhtlinna chu lirthei neitu leh khalhtute kutah thui tak a innghah thu a sawi a, "Fimkhur taka lirthei khalh leh tlawmngaihna vawn reng a pawimawh," a ti a; rinawmna leh taimakna nen hna thawk a, ṭhangtharte zirtirtu ni zel turin lirthei khalhtute a chah.

Road Safety Month hman chhungin MVI, Police leh Excise ten khawng takin lirthei leh a khalhtute endikna (checking) an kalpui dawn a; kawngpuia veivâk leh lirthei khalhtute him nan inzirtirna uar zawka kalpui a ni ang.

NCC-te'n traffic duty-te an pui dawn a; lirthei zuar (vehicle dealer)-te'n an dawr hmunhmaah Road Safety Month lam hawi inzirtirna an tar dawn bawk a ni.