AR-te chhuahsan tur ram mipui tana ṭangkai thei ang bera hman beisei

Central YMA executive committee tunhnaia ṭhukhawm chuan Aizawl khawpui lailia Assam Rifles-te'n an chhuah san tur ram mipui tana a ṭangkai thei ang bera hman an beisei.

CYMA chuan October 23, 2024-a Mizoram sorkar leh Assam Rifles hotute'n inremna an ziah tawh angin, AR-te hian Aizawl khawpui lailia an awmna an chhuahsan dawn hnai nia a lan thu tarlangin, "Assam Rifle-te'n an chhuahsan ramte hi mipuite tana a ṭangkai thei ang bera hman a nih theih nana hma la turin sorkar kan ngen," an ti.

Hun lokal zelah mimal, political party, kohhran leh pawl hrang hrangte chu mahni tana remchang zawng lo tura ngenin CYMA chuan, "AR ram luah chhunga mimal LSC nei eng emaw zatin, mipui hmakhua ngaia an LSC an hlan let hi a ropui kan tiin ram leh hnam tana an inpekna kan ngaihlu tak zet," an ti a, LSC nei dangte chu ram leh hnam tana hlan ve turin an ngen.