IAF hnena Lengpui Airport hlan chungchang NGOCC-te hrilhfiah

Working Committee on Lengpui Airport chairman TBC Lalvenchhunga, adviser to CM chuan nimin khan Planning conference hall-ah NGO Coordination Committee hruaitute a kâwm a; Mizoram sorkarin India Air Force (IAF) hnena Lengpui Airport hlan a tum chungchang a sawipui.

TBC Lalvenchhunga hian Mizoram sorkarin IAF hnena Lengpui Airport hlan a tum chhan te, IAF hnena hlan a nih avanga Mizoram sorkarin hlâwkna a neih tur te, a hlauhawm loh dan te, Airport Authority of India nena an inbiak dante leh social media-a thuthang hrang hrangte a sawifiah a; NGOCC hruaitute'n zawhna an neihte a chháng bawk.

Hetih lai hian, NGOCC hruaitute chuan IAF hnena Lengpui Airport hlan chu an duh loh thu August 2024 khan an lo tihtluk tawh avangin, an dinna ngaiah an la din thu an sawi.

NGOCC hruaitute August 9, 2024-a ṭhu­khawm chuan IAF hnena Lengpui Airport hlan an remtih loh thu an puang a; "Mizoramin kan thil neih hlu em em leh neih chhun Lengpui Airport hi IAF kuta hlan tumna a awm niin kan hria a, NGOCC chuan Lengpui Airport hi IAF kuta hlan a remti lo a ni," tiin thu­chhuahah an tarlang.