Vawiin aṭangin truck an tlân dawn lo, Kolasib-a truck neitute'n an thlawp

Mizoram Truck Owners Association (MTOA) leh Mizoram Truck Drivers Association (MTDA)-te ruahman angin vawiin aṭang hian Vairengte leh Sairang inkarah kawngpui a chhiat em avangin truck-te an tlân dawn lo.

Kolasib District Truck Drivers & Owners Joint Action Committee chuan thuchhuah siamin, MTOA leh MTDA hmalakna chu an thlâwp dawn thu an tarlang a; Kawnpui Town Drivers ten duty-na hmun an siamah JAC member-te a tam thei ang duty-a chhuak turin an hriattir a ni.

Tarlan tawh angin, MTOA leh MTDA chuan Vairengte-Sairang inkar kawngpui a chhiat avangin an truck-te a chhe nasa a, a khalhtute nunna atan pawh a hlauhawm tâk hial avangin January 23, 2025 aṭangin an tlan dawn tawh loh thu January 20, 2025 khan an puang.

Truck neitu leh khalhtu pawlte chuan, "Truck tlân ngama kawng hi siam a nih hma chuan Mizoram chhunga bungraw phur truck a tlân lo ang," an ti a; mipui hriatthiamna an dil a ni.