Hmun ṭhenkhata ration buhfai an la sem loh chhan sawifiah

Food, Civil Supplies & Consumer Affairs (FCSCA) department chuan thuchhuah siamin, January 2025-a hmun ṭhenkhata ration buhfai sem a la nih loh chhan chu National Informatic Centre (NIC) lamah harsatna (technical problem) a awm vang a nih thu an tarlang.

FCSCA department chuan hmun ṭhenkhata ration buhfai la sem loh chhan sawifiahin, "NIC lamah technical problem a awm vang a ni. He harsatna thlen chhan hi tun hmain Ration Card Management System (RCMS)-ah district pathum Saitual, Khawzawl leh Hnahthialte dah hran loh an ni a, January 2025 aṭang hian heng district pathumte hi anmahni district-a an inrêlbàwl theih nan dah hran ṭan an ni," an ti.

RCMS-a district pathum dah thar an nih avangin buhfai semna atana hman ber ration pekna portal-ah buaina a awm a, ePos khawl (kutzungpui nemna)-ah harsatna a awm phah bawk tih tarlangin FCSCA chuan, "Hemi chingfel tur hian a enkawltu NIC, Hyderabad-a an hotute nen inbiakpawh reng a ni. A tam zawk siamfel tawh a ni a, buhfai pawh hmun tam takah sem chhuah mek a ni," an ti a; harsatna chu chinfel thuai a ni dawn tih sawiin, chî-âi lo turin mipui an chah a ni.