Kuhva rah man loh vangin Sangau OC suspend a ni

Mizoram Police chuan thuchhuah siamin, Mizoram police-te man tawh sa kuhva rah chu Assam Rifles-in man nawn lehin, an man anga media-a an puanzar chungchang chu an sawifiah a; kuhva rah chu police-in an man loh thu leh, hei vang hian Sangau OC suspend a  nih thu an tarlang.

Police thuchhuah tarlan danin, Myanmar ramri kaltlanga dan loa Archhuang, Mizorama phurh luh kuhva rah ip 550 chu Archhuang Primary School leh Anganwadi Centre-ah thla hnih chuang dah a ni. Lockdown avangin phurh chhuah theih a nih loh thu leh sikul ṭan a hnaih tawh avanga phur chhuak tura an ngen angin kuhva rah neitute'n Sangau Police Station-a officer in-charge (OC) hnenah ṭanpui turin an ngen a ni.

Sangau PS OC chuan phone-in Lawngtlai SDPO a biak hnuah SDPO thupek angin village task force-te'n an lo tihbuai lohna turin police-in lehkha an siamsak hmangin kuhva rahte chu Archhuang aṭangin a neitute'n an phur chhuak a, Siachangkawnah Assam Rifles-in an lo man ta a ni.

Kuhva rah chu Sangau PS OC-in a man lo a, PS General Diary-ah pawh ziah luh a ni lo tih tarlangin police thuchhuah chuan, "Seizure memo pawh siam a ni lo. Sangau PS OC hi hetianga danin a phal loh bungrua man loa a phurh chhuahna kawnga a lo puih avangin September 15, 2020 aṭanga suspend nghal niin, departmental enquiry lak mek a ni. Lawngtlai SDPO pawh advisory memo pek a ni a, a inhnamhnawih dan chhui mek niin, a ṭul anga action lâk a ni ang," a ti.