Mizoram Police din champha lawm a ni

22nd January, 2025

Police-te chuan nimin khan Mizoram hmun hrang hrangah Mizoram Police din champha vawi 53-na an lawm. Police Headquarters-ah chuan Arya Mess-ah DGP Anil Shukla hoin lawm a ni a, police mi leh sa hrang hrang hnenah chawimawina hlan a ni.

DGP Anil Shukla chuan, hmarchhak ram buai karah Mizoram chu remna leh muanna awmna hmun a nih thu a sawi a, "A bikin kum khat leh a chanve vel kal taa kan chhehvel rama thil thleng hrang hrang karah Mizoram chu remna leh muanna hmangin nghet takin a ding a, remna leh muanna kan neih mek hi a chhiat kan phal tur a ni lo," a ti.

Ruihhloin Mizoram a rûn mek thu leh ṭhalai tak takin an thihpui tawh thu sawiin DGP chuan, "Ruihhlo do kawngah hian demand leh supply kan do a ngai a, a bikin supply do kawngah ṭan kan lak nasat a ngai. Mizoram police mi leh sa zinga 75% velin vaihhlo kaihhnawih kan ti a, kan hriselna kan ngaih pawimawh a ngai hle," a ti a, Mizoram tan theihtawp chhuah zel turin police kal khawmte a chah.

DGP hian police 51 hnenah DGP Commendation Disc a hlan a; Union Home Ministers Medal for Excellent in Investigation 2023-2024 dawngtu SI Lalnuntluanga, Lunglei DEF leh Best Police Station 2024 Award dawngtu Vaivakawn Police Station hnenah chawimawina a hlan bawk.

January 21, 1972 khan Assam state hnuaia Mizo district chu union territory a ni a, hemi ni vêk hian Mizoram inspector general of police (IGP) hmasa ber IJ Verma, IPS chuan a pisa a luah ṭan. Mizoram IGP hmasa berin pisa a luah ṭan ni, January 21 hi Mizoram Police din ni atan hman a ni.

Mizoram Police din champha hi district dangahte pawh hman a ni a; Kolasib-ah chuan police-te'n District Hospital-ah thisen unit 20 an pe. Champhai PS chu BC Lalthlamuana Academy zirlaite'n an tlawh a, Zokhawthar PS chu Zokhawthar Secondary School zirlaite' tlawhin, Dungtlang PS pawh Dungtlang H/S zirlaite'n an tlawh.

District hrang hranga police station leh out post-ahte Mizoram Police din champha hman a ni a; khawlai tihfai te, dan chi hrang hrang inzirtirna te, ruihhlo ṭhat lohzia inzirtirnate'n hun hman a ni.