MzSRLM leh Reliance Retail ten MoU ziak

Mizoram State Rural Livelihoods Mission (MzSRLM) leh Reliance Retail Limited chuan nimin khan Mumbai-ah thawh dunna thuthlung, memorandum of understanding an ziak. MoU hi Mizorama thar sawhthing, Mizo hmarcha, sapthei, lakhuihthei leh dragon fruit-te Reliance Fresh/Smart Outlets-a zawrhna tura inremna a ni.

MoU hi Freshpik, Jio World Drive, Bandra Kurla Complex, Mumbai-ah ziah a ni a; MzSRLM aiawhin chief operating officer Dr Zomuankima'n hming a ziak a, Reliance Retail aiawh Reliance Retail Limited aiawhin chief executive officer Damodar Mall-in hming a ziak.

Thuthlung ziahnaah hian Rural Development minister Prof. Lalnilawma, adviser to CM Dr KC Lalmalsawmzauva, OSD to CM Jonathan Lalremruata, MzSRLM hnuaia Ropuiliani Women Farmer Producer Company Limited CEO Khumsanga Hauzel te pawh an tel.

Inremna thuthlung hnuaiah hian Ropuiliani Women Farmer Producer Company Limited leh MzSRLM hnuaia producer group leh self help group member-te thar thlaite Freshpik, JWD, Mumbai-ah pho chhuaha zawrh ṭhin a ni ang.

Reliance Retail hian India ram hmun hrang hrangah outlets 3,200 chuang a nei a, Freshpik Gourmet Grocery Stores pahnih, collection centre 107 leh distribution center 28 an nei bawk.