Ran chaw kg 1,50,000 thar theih beisei

Animal Husbandry & Veterinary (AH&Vety) minister C Lalsawivunga chuan nimin khan Thenzawla AH&Vety Farm a tlawh a; ran chaw chìnna hmun, buh ṭín 127-a zau aṭangin ran chaw kg 1,50,000 thar theih beisei a nih thu a sawi.

C Lalsawivunga chuan, AH&Vety-in Thenzawlah ram acre 769-a zau an neih thu sawiin, "Ran vulhtute'n an chhawr ṭangkai hle. Buh ṭín 57-a zau ran chaw chìnna hmun chu sorkar hmalaknain kum 2024-ah chuan ṭín 127 hmun zeta zau ran chaw siamna hmun kan nei tawh. Ran chaw hi a ro (dry) hralh chhuah theih tura peih a ni tawh a, kg. 1,50,000 zet thar theih beisei a ni. Ran vulhtute tan a awlsam zawk nan ran chaw hi Selesiha AH&Vety Farm-ah lak phei dan ngaihtuah a ni," a ti.

Mizoramin artui a intodelh theih nan hma an lak mek thu sawiin Minister chuan, "Kumina bul ṭan turin arpui, a tui tam chi 1,00,000 vulh theihna turin hma kan la mek a, a hmunhma tur leh thawktu kan nei ṭha a, Mizoramin bung thar kan kai ngei dawn a ni,” a ti.

C Lalsawivunga chuan, Rashtrya Gokul Mission hmangin sial vulhtute tan sial liah tur chi (salt) siam mek a nih thu leh, Thenzawla Vety hmunhmate chu ṭangkai taka hman a nih theih nan ruahmanna hrang hrang kalpui mek a nih thu a sawi.

AH&Vety Minister hian Thenzawla Zo-Sial humhalhna tura din Sial Farm hmunhma pawh a tlawh. Sial farm-ah hian Zo sial pariat vulh mek a ni a, tipung zel turin department-in hma a lak mek thu Minister chuan a sawi a ni.