Infiammite bána kaihna tur hawn a ni; Hmasawnna kan hmuh ngei ka ring - CM

Chief minister Lalduhoma chuan Mizoram sorkarin infiammite bána a kaihna tura a duan 'Handholding Empowering Mizoram Sports' tih chu nimin khan Economics & Statistics directorate conference hall-ah a hawng.

CM Lalduhoma chuan, June 2024 khan Mizorama a vawi khatna atan Mizoram Sports Conclave buatsaih a nih thu sawiin, "India rama infiamna lama hriatna thûk tak tak neite nen kan sorkarin sport hmasawnna atana kan hmalak dan tur inrawnkhawmna kan nei a, khami ṭum khan Mizoram sorkarin Vision 2036 kan kalpui tur thu ka puang a ni," a ti.

India ram hian Olympics 2036 thlen a tum thu sawiin Lalduhoma chuan, "Dilna pawh a thehlut tawh a, Prime Minister leh ram hruaitu liante pawh an phûr hle. He Olympics lo awm tur hi thlirin Mizo ṭhalaite'n India ram aiawha Olympics-a an inlan ve ngei theih nan vawiin aṭangin hma kan lo la ve dawn a ni," a ti a; tih tur hmasa chu naupang theihna (talent) nei ṭhate zawn chhuah a nih avangin chumi atana hmalakna tur Handholding EMS an hawn a nih thu a sawi.

Chief Minister chuan, ṭhalai thlan chhuahte hnena training ṭha pek mai bakah infiamna hmunhma ṭha tak tak neih belh pawh an tum dawn thu a sawi a, "Olympics sports discipline Mizote khelh theih chi, infrastructure kan la neih si loh lamah kan mit kan lên ang. Sports Minister ṭha tak kan nei a, a thlamuanthlak a, kum rei lo têah hmasawnna hmel duhawm tak tak kan hmuh ngei ka ring," a ti a, EMS kalpuitute chu huapzo hmalakna, a tling leh tlakte ngei dap chhuah hna thawk turin a chah.

Sports minister Lalnghinglova Hmar pawhin thu sawiin, "EMS hmalakna hian thingtlang kilkhawr ber ber a thleng phâk dawn. Mahse, a thlawna inpek hi kan kalphung a nih loh avangin sawmna kan dawnna hmun kan pan ṭhin ang. A bik takin Olympics sports discipline zinga Mizote'n theihna an neihna ni si lamah zel kan insáwrbing ang," a ti.

Lalnghinglova Hmar chuan, sorkarin amahin eng mah a kalpui thei lo tih sawiin, "Khaw tina khawtlang hruaitute leh Mizoram State Sports Council (MSSC)-te nena ṭang tlangin kan kal dawn," a ti a, thawhpui atana corporate lian tak tak nena an inbiak mek thu a sawi.

MSSC secretary Henry C Lalrawnkima chuan MSSC-in EMS hmachhawp leh hmalak tawh chinte a sawifiah. EMS bul ṭan nan hian Mizoram sorkar chuan cheng nuai 250 a dah a, tunah hian naupang theihna nei dap chhuahna hmahruai atan Tuichangral leh Tuipuiral games huaihawt ṭan a ni.

EMS hawn inkhawmah hian Assembly speaker Lalbiakzama, minister pahnih C Lalsawivunga leh Lalthansanga, minister of state B Lalchhanzova, Lok Sabha MP Richard Vanlalhmangaiha, adviser to CM pahnih Lalmuanpuia Punte leh H Ginzalala bakah, MLA ṭhenkhat an tel.