Mizoram sorkar leh HPC(D) an inbia September 2016-ah inbiak leh a ni dawn

Mizoram sorkar leh Hmar People's Convention (Demo-cratic) hotute chu nimin khan chawhma dar 11 aṭangin Tourist Lodge, Chaltlangah an inbia. September 2016 chhunga inbe leh turin thu an dah.

Inbiaknaah hian Mizoram sorkar aiawhin Home depart-ment-a additional secretary Lalbiakzama, CID (Special Branch) SP RD Chawngthu, Home department joint secretary Lalhriatpuia leh under secretary David H Lalthangliana te an tel.

HPC(D) aṭangin team leader chu Lalṭhalien a ni a; team member-te chu - Dr John Pulamte, Rohringa, Lalthlamuana Hmar, Francis Songate leh Thangliensung te an ni.

Nimina inbiakna hi boruak zalen leh zângkhai taka neih a ni a; Mizoram sorkar aiawhte hotu Lalbiakzama chuan Vanglaini zawhna chhangin, inbiaknaa HPC(D) lamin an thil duh leh phût an sawite chu sawi chhuah a la rem lo tih a sawi a, "Hmasawnna erawh chu kan neiah kan ngai," a ti.

Inbiaknaah hian thu mûm la awm lo mah se, kum September thla chhungin hun remchang hmasa bera inbiak chhunzawm leh turin thu an dah a ni.

Mizoram sorkar leh HPC-(D)-te inbiak hnuhnun ber chu August 14, 2013 kha a ni a, chumi ṭum chuan Tourist Lodge, Chaltlangah tho an inbia. Inbiaknaah hian July 31, 2013-a tàwp tawh, Mizoram sorkar leh HPC(D) ten Suspension of Operation (SoO) an neih chungchang sawiho a ni.

He inbiaknaah hian HPC(D) lamin September 2013 thleng pawhsei a, chumi chhunga political level-a inbiak an rawt a, sorkar lamin thla ruk chhung atana pawhsei a, chumi chhunga political level inbiak an rawt thung. SoO pawhsei hun chhung chungchangah an thu a inhmuh loh avangin SoO chu pawhsei a ni lo a; thu mûm an nei thei lo.

Mizoram sorkar leh HPC(D)-te hi July 18, 2013-ah Tourist Lodge, Chaltlangah an inbe tawh bawk a; hemi ṭum hian HPC(D)-te chuan 6th Scheduled hnuaiah Autonomous District Council (ADC) an dil a, kil thum aṭanga inbiak an rawt bawk.