MSSC leh Samagra Shiksha-in MoU ziak

Mizoram State Sports Council (MSSC) leh Samagra Shiksha chuan nimin khan Secretariat conference hall-ah Mizoram infiamna tihhmasawnna atana thawh dunna turin inremna thuthlung, memorandum of understanding (MoU) an ziak.

Inremna thuthlungah hian MSSC aiawhin secretary Henry Lalrawnkima leh Samagra Shiksha aiawhin project director Lalthanzira ten hming an ziak a; School Education minister Dr Vanlalthlana leh Sports minister Lalnghinglova Hmar te chu hriatpuitu niin hming an ziak bawk.

Education minister Dr Vanlalthlana chuan, "He MoU kaltlang hian kan sports fund neih ang angte awmze neih zawk leh ṭangkai zawka hmanna kawng a hawn phah dawn a, a phûrawm hle a ni," a ti.

Sports minister Lalnghinglova Hmar chuan, "Mizoram pum huapa ṭhalaite theihna hai chhuah programme kalpui tum mek a ni a, hei hian Mizoram chu sports-a tihhmasawn bakah Olympic 2036 tinzawna kan lo inpuahchahna a ni tel bawk," a ti a; Bána Kaih Policy kaltlangin nasa takin infiamna tihhmasawn nan hmalak tum a nih thu a sawi.

Samagra Shiksha hian Grassroots Level Sports Development an kalpui mek a, naupang kum 6-18 a huam. Mizoram sorkarin Bana Kaih Policy hmalakna atan ṭhalaite theihna hai chhuahna programme Mizoram pum huapa kalpui a tum mek bawk. Programme pahnihte hi infiamna tihhmasawnna lama hmalakna tur ve ve a ni.