Youtuber leh facebooker-te lakah Cyber Crime-ah FIR thehluh a ni

Mizoram State Commission for Protection of Child Rights (MSCPCR) chuan tun hnaia social media-a dan loa che kum tling lote hming, thlalak, video leh chenna hmun tilang thei tur pho chhuaktu youtuber leh facebooker-te lakah Cyber Crime Police Station, Aizawl-ah first information report (FIR) a thehlut.

MSCPCR chairperson Jimmy Laltlanmawia chuan, dan loa che kum tling lote hming, nihna, thlalak, video leh address-te tun hnaia Youtube, Facebook, Whatsapp leh digital media platform hrang hranga tarlan a ni leh ṭhin chu ngaimawhawm an tih thu a sawi.

Jimmy Laltlanmawia chuan, "Hetiang hi The Juvenile Justice (Care & Protection of Children) Act, 2015, Section 74 chuan a khap tlat a ni. Naupangte hming, address, thlalak, video leh a dangte pho lan a nih chuan nakin zela naupangte an lo ṭhan len huna khua leh tui ṭha an nih theihna tur kawng dâltu leh mi dangte'n an chhinchhiah bik theihna tur thil pawi tak a nih avangin danin a khap tlat a ni," a ti.

Dan bawhchhetute chu thla ruk thleng tàntir leh Rs 2,00,000 thleng chawitira hrem theih an nih thu sawiin MSCPCR chairperson chuan, "Commission chuan dan bawhchhetute chu hrem an nih theih nan hma a la zel dawn," a ti a; social media leh digital media hmangtute chu fimkhur turin a chah a ni.