Ruihhlo vangin 2024-ah mi 67 thi; 2025-ah ruihhlo vanga thi la awm lo

Excise & Narcotics department (END) chhinchhiah danin, nikum 2024 chhung khan Mizoramah ruihhlo vangin mi 67 an thi a, kum 2023 aiin mi pakuain an tlem. Kum 1984 aṭanga 2024 thleng khan ruihhlo vangin mi 1,879 an thi tawh a, kuminah thi an la awm lo.

END chhinchhiah danin, kum 2024 chhunga ruihhlo vanga thi mi 67-te chu mipa 58 leh hmeichhia pakua an ni a, kum 21 leh 57 inkar an ni. Mi 67 zinga 39 chu heroin ti ṭhin an ni a, mi 28 chu ruihhlo dang ti an ni thung.

Kum 1984 aṭanga 2024 thlenga Mizorama ruihhlo vanga thi END-in mi 1,879 an chhinchhiah a, chu'ng zinga 1,653 (87.97%) chu mipa niin, 226 (12.03%) hmeichhia an ni. Kum 2023 chhung khan ruihhlo vangin mi 76 (mipa 64 leh hmeichhia 12) an thi a, kum 2004 hnua ruihhlo vanga thi tam ber kum a ni.

Mizorama ruihhlo vanga thi tam lai chu kum 1998-2004 inkar a ni a, hemi kum sarih chhung hian kum tin mi 80 aia tlem lo an thi a, kum sarih chhunga ruihhlo vanga thi belhkhawm chu mi 785 niin, chawhrualin kum tin mi 122 zel thi an awm ang a tling. Hetih hun laia an thihpui tam ber ruihhlo chu proxyvon/pasvon spas a ni.

Ruihhlo vanga thi tam ber kum 2004 khan mi 143 an thi a, mipa 122 leh hmeichhia 21 an ni a; kum 2000-ah mi 139 (mipa 128, hmeichhia 11) leh kum 2003-ah mi 136 (mipa 124, hmeichhia 12) an thi.

Excise & Narcotics department-in an chhinchhiah chinah Mizorama ruihhlo vanga thi mi 1,879 zinga 1,161 (61.78%) chu proxyvon leh parvon spas vanga thi an ni a; kum 2017 aṭangin proxyvon/parvon spas vanga thi an awm tawh lo.

Kum 2016-2024 inkar chhungin heroin vanga thi 165 an awm tawh a, chawhrualin kum 9 chhung hian kum tin heroin vanga thi 18 an awm ang a ni.