Viksit Bharat Young Leaders Dialogue-a tel turte LESDE Minister hoin thlah a ni

Labour, Employment, Skill Development and Entrepreneurship (LESDE) minister Lalnghinglova Hmar hoin nimin khan a pisaah Viksit Bharat Young Leaders Dialogue, 2025-a Mizoram aiawha tel turte thlahna hun hman a ni.

Mizoram team hi inelna theme pali - Tech for Viksit Bharat, Enhancing Productivity in Agriculture, Empowering Youth for Viksit Bharat leh Empowering Women and Improving Social Indicators-ah an tel dawn a ni.

LESDE minister Lalnghinglova Hmar chuan, Mizoram team chu an kal chhan hre chiang turin a chah a, theihtawp chhuah tur leh nuam taka hun hmang turin duhsakna a hlan.

Lalnghinglova Hmar chuan, inelna hmachhawn turin an kal tih hre reng tura chahin, "Thil dang dahṭhainin kal chhanah insâwr bing ang che u. Inrintawkna nei turin a inbuatsaih theih a, kan la dai ngai loh thil a nih pawhin kan beisei theih tur ang boruak atan a inbuatsaih theih a, kan chêttlatna turte kan lo zir chiang lawk thei a ni," a ti.

Viksit Bharat Young Leaders Dialogue 2025 hi January 11-12, 2025 chhungin Bharat Mandapam, New Delhi-ah neih a ni dawn a ni.

India ram hmun hrang hranga ṭhalaite chu mithiamte leh sorkar laipui hotute hmaah thupui thlan bik 10 aṭanga India ramin hmasawnna rahbi kai a tum meknaa ke pên theih dan turte an sawi dawn. Mizoram aṭanga tel turte chu Hrangbana College-a associate professor Dr Rosaline Varsangzuali leh associate professor Dr H Lalzuithangi ten an hruai ang.

Dialogue-a tel turte thlan nan November 2024 aṭang khan online quiz, essay competition leh state level PPT presentation hmangin inelna buatsaih a ni a; chuta ṭang chuan New Delhi-a final stage-a tel turte thlan a ni.