Ramri khuahkhirhah km. 10 pawn lama mite tan ruahmanna a awm lo?

Mizoram (India) leh Myanmar inkalpawhna turin ramri aṭanga km. 10 huam chhunga chengte tan Ministry of Home Affairs (MHA) thu angin ruahmanna siam a ni a; km. 10 huam chin páwn lama awmte tan ruahmanna siam a awm lo thung.

January 3, 2025 khan Champhai SP chuan vantlang hriattirna (public notice) tichhuakin, India-Myanmar ramri kân turte hriat tur a tichhuak a; hriattirna chu MHA (Border management-I Division) lehkha December 24, 2024-a tihchhuah leh Mizoram sorkara Home department lehkha December 30, 2024-a tihchhuah anga siam a nih thu a tarlang.

India (Mizoram) leh Myanmar ramri kân turte tana hriat tur tarlante hi ramri aṭanga km. 10 huam chhunga mite tan a ni a, km. 10 huam chhunga cheng, mahni nihna tichiang thei (identity proof) lehkha pawimawh neite hnenah phalna (border pass) pek theih a ni.

Border pass chu police, medical mi leh sa leh Assam Rifles mite'n an buaipui ṭhin dawn a; ni sarih chhung dam tura tih a ni. Ramri aṭanga km. 10 huam chhunga mite hnenah phalna pek theih a ni a, ramri kâna kalnaah km. 10 aia thui thlen phal a ni lo.

Ramri kân turte tana border pass pek theih dan tur ruahmanna siam a nih lai hian, km. 10 huam chin páwn lama awmte tan ruahmanna siam a awm lo nia thu dawn a ni.

Vanglaini palai zawhna chhangin Champhai Bawrhsap chuan, sorkar laipui aṭanga lehkha rawn kalah km. 10 huam chin pawn lama awmte chungchang tarlan a awm lo nia a lan thu a sawi a, "Police hotute leh Assam Rifles lam nen kan la sawiho a ṭul ang," a ti a; tunah chuan km. 10 huam chin páwn lama mite chungchangah sawi theih a la awm loh thu a sawi.

Tarlan tawh angin, India (Mizoram) leh Myanmar inkal-pawhna pui ber, Zokhawthar leh Khawmawi inkara Ṭiau luia lei chu ramri vengtu Assam Rifles-te'n duh duha kaltlang theih loh turin January 1, 2025 aṭang khan an khâr a, kaltlang turin nihna tichiang thei document neih a ngai.

India/Mizoram aṭanga Myanmar rama lut turin Aadhaar card leh document dang nei lo chu kal tlang phal a ni lo a; Myanmar ram lam aṭanga India/Mizorama lut turin Myanmar sorkar thuneitute hriatpuina lehkha keng lo chu gate paltlang phal a ni lo.