India (Mizoram) leh Myanmar ramria inkalpawhna khauh zawkin khuahkhirh

India (Mizoram) leh Myanmar inkalpawhna pui ber, Zokhawthar leh Khawmawi inkara Ṭiau luia lei chu ramri vengtu Assam Rifles-te chuan duh duha kaltlang theih loh turin an khâr a, kaltlang turin nihna tichiang thei document neih a ngai.

Thu dawn danin, India-Myanmar ramri vengtu Assam Rifles chuan January 1, 2025 aṭang khan Zokhawthar-Khawmawi Ṭiau lei kaltlanga lut leh chhuak turte aṭangin document an phût a ni.

India/Mizoram aṭanga Myanmar rama lut turin Aadhaar card leh document dang nei lo chu kal tlang phal a ni lo a; Myanmar ram lam aṭanga India/Mizorama lut turin Myanmar sorkar thuneitute hriatpuina lehkha keng lo chu gate paltlang phal a ni lo bawk.

Ramri lei bula thuneitute'n lehkha an tàrah chuan, ramri kâna luh leh chhuah theih hun chhung chu zing dar 6 aṭanga tlai dar 3:30 inkar a ni tih tarlan a ni.

Myanmar lam aṭanga rawn lutte chu Zokhawtharah lo chhinchhiahin, Single Entry Border Pass siamsak an ni. Single Entry Border Pass-ah chuan hming leh nihna hrang hrang bakah, India/Mizorama luh chhan leh chàm hun chhung tur te, pass dam chen (validity)-te ziah a ni.

Single Entry Border Pass chu India leh Myanmar rama ramri aṭanga km. 10 huam chhunga mite tan chauh pek theih a nih thu leh km. 10 thleng bak kal phal a nih loh thu te, ni sarih thleng atan pek theih a nih thu te, km. 10 aia thui kal leh pass pek aia rei châmte chu man theih an nih thute tarlan a ni bawk.

Ramri kâna veivâkte khauh zawka khuahkhirhna hi sorkar laipuia Ministry of Home Affairs aṭanga December 2024-a thupek anga kalpui nia sawi a ni.