Governor Kambhampati a chhuak ta

Mizoram Governor kal chhuak Dr Hari Babu Kambhampati chuan nimin January 2, 2025 khan Mizoram a chhuahsan a, Chief Minister leh minister dangte'n Lengpui Airport-ah an thlah.

Dr Hari Babu Kambhampati hi Mizoram Governor 22-na a ni a, July 21, 2021 khan lak luh niin, kum thum leh thla nga chuang hret Mizoram Larsap a ni. Ruahman dan chuan vawiin January 3 hian Odisha Governor atan lak luh a ni dawn.

Mizoram Governor thar tur Gen. (Dr) Vijay Kumar Singh chu January 8, 2025 khian a lo thleng dawn a, January 9-ah lak luh a ni ang.

Amah thlahnaah Dr Hari Babu Kambhampati chuan, Mizoram Governor a nih chhunga tawiawmna leh duhsakna chi hrang hrang a dawn thin avanga a lawm thu a sawi a; Mizoram chu a thinlungah a chàm reng tawh dawn thu sawiin, hma lam hun atan duhsakna a hlan.

Hari Babu Kambhampati chuan, Mizoramin hmasawn tura theihna nasa tak a neihte chu chak taka bawhzui a ngaih thu sawiin, Mizo thalaite'n theihna leh thiamna an neih that thu sawiin, thiamthil zirnaah intuai hriam lehzual a, state pawna hna thawk thei tura hmalak zel a tul thu a sawi. "Inthlanna leh assembly session kalpui dante hi ram chhung hmun dangte tana entawn tlak tak a ni," a ti bawk.

CM Lalduhoma pawhin Mizoram tana tha leh tui a lo sen tawhnateah Hari Babu Kambhampati chu lawmthu a hrilh a; a hna thar turah duhsakna hlanin, hun remchangah Mizoram tlawh leh turin a sáwm a ni.

Governor kal chhuak thlahnaah hian Assembly speaker Lalbiakzama, minister K Sapdanga leh Vanlalhlana, chief secretary Khilli Ram Meena, DGP Anil Shukla leh sorkar official dangte an tel.