Halpuah hâl kan ûm zui zel dawn - Home Minister

Home minister K Sapdanga chuan, Krismas leh kum thar lawmna vuakvêtah halpuah leh halmawi hâl a nih lohna tura hmalakna bawhzuitute leh sorkar thupek zawmtute chungah lawmthu a sawi a; khapna thupek bawhchhiaa hâltute ûm zui zel a nih dawn thu a sawi.

Home Minister chuan media hmaah, halpuah hâl a nih lohna tura hma latu hrang hrangte chungah a lawm thu sawiin, "Sorkarin halpuah a khapna leh YMA leh kohhrante ngenna mi tam zawk, 80% aia tam mahin an zâwm a, khapna leh ngenna an ngai pawimawh hi kan lawm tak zet a ni," a ti.

December 31, Thawhlehni zanah Aizawl leh khawpui dangahte halpuah hâl an awm nual tih sawiin K Sapdanga chuan, "Sorkar thupek leh kohhran leh YMA ngenna zâwm lo an awm a, a vanduaithlak a, a pawi kan ti tak zet a, kan rilru pawh a na em em a ni," a ti a; halpuah hâl leh hâltu erawh kum dang aiin a tlem zawk hle tih a sawi.

Home Minister chuan, halpuah hâlna hmunte hriat a nih hlawm thu sawiin, "Kan en liam mai dawn lo a, sorkar dan bawhchhia an nih miau avangin dan bawhchhia na nâ nâ chu kan ûm zui ve ang. Kum dangah pawh kan chhunzawm leh ang a, hetiang hi a thlen tawh loh kan beisei a ni," a ti.

Home minister K Sapdanga hian December 31, 2024 zan khan Aizawl hmun hrang hranga khawtlang duty-te a tlawh kual a; DIG (Northern Range) C Lalthanmawia, Aizawl DC Lalhriatpuia, Aizawl SP Rex Zarzoliana Vanchhawng, Central YMA president Lalhmachhuana leh general secretary Prof. Malsawmliana bakah, police hotu dangte leh media mite'n an tawiawm a ni.