Halpuah hâl vangin mi 13 man tawh

Aizawl khawpui chhungah December 31, 2024 zanlai vela kum thar 2025 lawmna atana halpuah hal vangin nimin tlai lam thleng khan police-in mi 13 an man tawh a, thubuai 24 ziah luh a ni tawh.

Kum dang ang bawkin Mizoram sorkar chuan hunpui vuakvêtah halpuah leh a kaihhnawih thilte a khap a; kohhran leh YMA-in halpuah leh halmawi hâl lo turin ngenna vawi eng emaw zat an siam bawk.

Aizawl khawpuiah chuan December 31, Thawhlehni zanah zanlai a nih dawn thlengin halpuah rî hriat tur a awm meuh lo a, zanlai dar 12 atangin hmun hrang hrangah halpuah hâl a ni thung.

Halpuah hâlte chu police-te'n a remchang ang angin an ûm zui a, hmun hrang hrangah drone an thlawhtir bakah, phone camera hmangtein thla an la bawk a; Thawhlehni zan (nimin zing) la la khan mi tlem azawng an man nghal a ni.

Thu dawn danin, halpuah hâl avangin police-te chuan nimin tlai lam thleng khan Aizawlah mi 13 an man tawh a, thubuai 24 an ziak lut tawh a; la ûm (chhui) zui tur eng emaw zat an chhinchhiah bawk.

Aizawl khawpui chhung bika man mi 13-te chu Aizawl Police Station hnuaia man mi panga leh Bawngkawn PS hnuaia man mi pariat an ni a; thubuai ziah luh tawh dan chu - Aizawl PS-ah 15, Bawngkawn PS-ah pali leh Vaivakawn PS-ah pali a ni. Kulikawn PS hnuaiah thubuai ziah luh leh mi man a la awm lo.