MJA-in damdawi-inah ṭanpuina an hlân

Mizoram Journalists' Association (MJA) General Head­quarters chuan an member-te leh anmahni duhsaktute'n Charity Fund an thawh khawm pawisate nimin khan Civil Hospital, Aizawl leh Mizoram State Cancer Institute (MSCI) hnenah an hlân.

MJA Gen.Hqrs. hian Krismas dawn apiangin mi harsate ṭanpui nan Charity Fund an thawh khawm ṭhin a, kumin pawh MJA member-te bakah, MJA duhsaktu mi ṭhenkhatin thawh khawm lehin, sum hmuh zawng zawng chu nimin khan an sem chhuak a ni.

MJA Charity Fund hi MJA president C Lalrambuatsaiha'n Civil Hospital medical superintendent Dr ST Lalruatfela hnenah Poor Fund atan Rs 50,000 leh MSCI nursing superintendent Lalrinpari hnenah Poor Fund atan Rs 37,370 a hlan.

Civil Hospital, Aizawl-a ṭanpuina hlannaah MJA president C Lalrambuatsaiha chuan, Civil Hospital chu mipui nâwlpui, hmun hrang hrang aṭanga pantu nei tam ber, khawsak harsa zawkte'n an pan khawm ber a nih thu a sawi a; damdawi-in pantute zingah mi harsa tak takte ṭanpuina atan MJA Charity Fund sum an hlan tih a sawi.

Civil Hospital medical superintendent Dr ST Lalruatfela pawhin thu sawiin, MJA nen thawhhona ṭha tak an nei tih sawiin, ṭanpuina sum an pek chu damlo harsate tan ṭangkai taka hman a nih tur thu a sawi a ni.

MSCI nursing superintendent Lalrinpari chuan, MSCI chu cancer veite pan khawm a nih thu sawiin, "Cancer veite inenkawl hi a hautak a, damlo zingah khawsak harsa tak tak an awm ṭhin avangin mi inphalte sum thawh khawm hmanga inenkawl ve ṭâwk ṭâwk an awm ṭhin," a ti a; MJA-in ṭanpuina an pe chu an lawm hle tih sawiin, damlo eng emaw zatin ṭangkai taka an hman tur thu a sawi.

Lalrinpari sawi danin, MSCI hian kumin January aṭanga November chhung khan Poor Fund-ah Rs 10,06,464 an hmu a, Poor Fund aṭanga sum an pek chhuah erawh chu Rs 22,76,623 a ni.

MJA hian nimin zing khan an member kum 70 tling chin mi pakua hnenah Krismas thilpek an hlan bawk.

MJA chuan Charity Fund thawhtute zawng zawng chungah an lawm thu leh, a bik takin MJA member ni lo chunga sum thawhtute chungah an lawm tak zet tih an tarlang.