KMMTTP kawng July 2025-ah zawh tum

Kaladan Multi Modal Transit Transport Project (KMTTP) kawng km. 109-a thui siam turah siam zawh loh km. 70 a la awm a, July 2025-ah siam zawh tura ruahman a nih thu Parliament House-ah tarlan a ni.

Parliament winter session neih mekah Rajya Sabha MP K Vanlalvena zawhna chhangin External Affairs minister of state Kirti Vardhan Singh chuan, KMMTTP-ah November 2024 thlengin cheng nuai 35,600 (vbc 356) hman ral a nih tawh thu a sawi a, "Km. 109 laih turah km. 70-a thui siam mek a ni a, km. 20 earth work zawh a ni tawh. July 2025-ah zawh hman tura ruahman a ni," a ti.

K Vanlalvena hian Mizorama tuialhthei leh gas zawn hna thawh mek a awm leh awm loh a zawh chungchangah Petroleum minister of state Suresh Gopi chuan, Mizoram chu block thumah ṭhenin Oil and Natural Gas Corporation (ONGC) leh Vedanta company-te'n an la thawh mek thu a sawi.

Commerce and Industry minister of state Jitin Prasada pawhin Indo-Myanmar ramri leh Indo-Bangladesh ramriah insumdawn tawnna tênau, border haat din a la nih loh thu K Vanlalvena zawhna chhangin a sawi bawk.

Mizoram MP hian Parliamentary Committee on Railways ṭhutkhawmah Bairabi-Sairang inkara rêl kawng siam mek chungchang a sawi a; chhungkaw paruk hnena zangnadawmna pek a la nih loh avangin Gauhati High Court, Aizawl Bench-in pe tura order a chhuah tawh hnuah Railways lamin an la pe lo reng chu dik lo a tih thu a sawi a ni.

K Vanlalvena hian Sihhmuia rêl chawlhhmun siam hna leh Sairang Kurung lui chunga rêl kawng tur lei (bridge) siam hna thawh mekte chu contractor-te'n an thawh muan thu Parliamentary Committee on Railways meeting-ah a sawi tawh bawk.

Mizoram Rajya Sabha MP hian Union Home Minister hnenah, Manipur-a buaina chhuah ṭan May 2023 aṭanga central armed force mi thi tawh zat, central armed force dah luh tawh zat, Manipur buaina vanga thite zangnadawmna pek leh pek lohte leh buaina vanga bungraw chhiate zangnadawmna an pek leh pek lohte a zawt bawk a ni.