Hunpui atan police an inpuahchah nasa; Hâlpuah khapna zâwm turin mipui ngen

Aizawl SP Rex Zarzoliana Vanchhawng chuan thuchhuah siamin, Krismas leh kum thar vuakvêt atan Aizawla police station pali-ah police dah belh a nih dawn thu leh, bazara harsatna tâwkte tan Israel Point, Bara Bazar leh Lower Zarkawt, V Lalliana Point-ahte Police Help Desk siam a nih thu a tarlang.

Rex Zarzoliana chuan, sorkarin hâlpuah leh hâlmawi a khap tlat thu tarlangin, "Dan bawhchhiate chu BNS 2023, Section 223 hnuaiah kum khat thleng lung-in tàn emaw, Rs 5,000 thleng pawisa chawitir emaw, a pahnih emawa hrem theih a ni," a ti a; halpuah leh a kaihhnawih thilte chu mihring leh ran hriselna tichhe theih a ni tih hre tur te, sorkarin a khapna zâwm ṭheuh tur leh sorkar thawhpui turin mipui a ngen.

Halpuah hâl vanga harsatna tâwk leh hâlpuah a rêm theih nana veitu tam tak an awm tih an hriat thu tarlangin Aizawl SP chuan, hnuchhuinaa police-te thâ tichak tura pui duhte tan dan bawhchhe lai thlalak/video record thawn theihna whatsapp number siam a nih thu a tarlang.

Aizawl SP chuan, "Aizawl khawpuiah Krismas leh kum thar boruak ṭha taka hman a nih theih nan leh mipui kan him theih nan Mizoram Police chuan tlawmngai pawlte nen thawhhona ṭha tak hnuaiah nasa takin hma a la a, khawpui chhunga tlawmngai pawl branch hrang hrangte nen halpuah leh halmawi khapna thupek kenkawh kawngah kan thawkho zel dawn a ni," a ti.

AIZAWL SP TARLAN DANGTE

* Aizawla veng hrang hrangah December 21, 2024 aṭangin zanah police-te an duty dawn.

* A ṭul huna rang taka che chhuak thei tur Quick Response Team atan Aizawla PS pali-ah police dah belh a ni dawn.

* Lirthei khalhtute chu dan zâwm a, mipui himna tana hlauhawm leh harsatna siam lo tur leh, zu leh ruih theih thil dang rûi chunga lirthei khalh lo tura ngen an ni.

* Khawlaia rûi chunga lirthei khalhte endik a ni dawn a, hmun hrang hrangah barricade siamin police dah a ni dawn.

* Zu vanga harsatna tam tak thleng thei a nih avangin rûi chunga buaina siam leh, zu zuar man an awm a nih chuan dan anga hrem zel an ni ang.

* Function leh programme buatsaihtute'n mipui kea kalte himna ngaihtuah chung leh, motor tlan tibuai lo zawnga hmun remchangah buatsaih tura ngen an ni.