5-star hotel tura tih Tourist Lodge, Chaltlang hlutna chhût zo tawh

Tourism department-in 5-star hotel atana a ruahman Chaltlang Tourist Lodge hlutna chu PWD mithiamte'n an chhût zo tawh a; Tourism department chuan hma an la chhunzawm mek zel.

Vanglaini palai zawhna chhangin Tourism director R Lalrodingi chuan, ngenna an thlen angin PWD-te'n Chaltlang Tourist Lodge hlutna an chhût thu leh an zawh tawh thu a sawi a, "Sorkarah request of proposal kan thehlut ang a, phalna kan hmuh hunah advertisment-te kan chhuah ang. Chaltlang Tourist Lodge hlutna chhût chhuah hi advertisment chhuah huna a chhâng turte'n an lo hriat lâwk a pawimawh vanga tihtir kan ni," a ti.

Tourism Director chuan, advertisment an chhuah hunah chháng duh pathum vel tal an awm ngei an beisei thu sawiin, "Chhángtute chu an sûlhnu leh pawimawh dangte uluk takin kan zir ang a, chuta ṭanga ṭha ber tur chu thlan tum a ni," a ti a; chhangtu pakhat chauh an awm a nih pawhin, pakhat aia tam chhangtu an awm tur a ni tih a nih kher dawn loh avangin harsat­na a awm loh tur thu a sawi.

Tarlan tawh angin, Tourism minister Lalrinpuii chuan November 11, 2024-a thuthar thehdarhtute a kawm ṭumin, Chaltlanga Tourist Lodge chu 5-star hotel-ah siam a nih theih nan mimal hnenah hlan tum a nih thu a sawi a ni.

Lalrinpuii chuan, Mizoramah 5-star hotel a awm miah lo chu an vei thu sawiin, ram pum leh ram dang huap ṭhutkhawm lian tham Mizoramin a thlen theih loh phah ṭhin thu a sawi a, "Hotel chain lian tak takte'n Mizorama 5-star hotel din an duhnate pawh kan hmu a, chuvangin, Chaltlang Tourist Lodge hi 5-star hotel a nih theih nan outsource mai turin hma kan la a, tih tur ang angte kan tifel nual tawh. Kan sorkar chhung ngeiin 5-star hotel kan neih theih ka beisei," a ti.