Ram a kal dik dawn chuan dan a lal a ṭul - Forest Minister

Environment Forest & Climate Change (EFCC) minister Lalthansanga chuan nimin khan Champhaiah Conservator of Forest (Eastern Circle) Auditorium leh Interpretation Center a hawng. Minister chuan, ram a kal dik dawn chuan dan a lal a ṭul thu a sawi.

EFCC Minister chuan, ramngaw chu ram hnuk pawimawh a nih avangin humhalh turin khauh taka kal a ṭul thu a sawi a, "Ṭhál tirah lui an kang dêr tawh a, tui indaih lohna a nasat tial tial tawh avangin tuihna humhalh hi chona lian tak a ni. Ramngaw humhalh kawngah hian hmasawnna kaihhnawih pawh ni se EFCC phalna lo chuan kutthlak a theih tawh dawn loh a, kan ram a kal dik dawn chuan dan a lal a ṭul,” a ti.

EFCC department chu mipui tana ding a nih thu sawiin Minister chuan, "Department nihna hriat chian loh avangin hnawk tih ṭhin a ni hi a pawi hle," a ti a; forest kaihhnawih dan tam ber chu state level-a thutlukna siam theih a ni lo a, sorkar laipui leh ram pum huap thil a nih avangin mipui hriatthiamna a ngen.

Sericulture minister ni bawk Lalthansanga chuan, Mizoram sorkarin malsawmna tam tak a dawng tih sawiin, "A vawi khat nan Mizoramah Sericulture Conclave neih a ni a, cheng vbc 13 pek kan ni," a ti a; Rubber Board of India hruaitute leh Chief Minister hmalakna zarah Chief Minister’s Rubber Mission tlangzarh a nih thu leh chuta tan chuan cheng vbc 27 ruahman a nih thu a sawi.

Khualzahawm Lt. Col. Lalhmingthanga, Champhai South bialtu MLA pawhin thu sawiin, tui thianghlim awm zelna turin tuihna leh ramngawte humhalh bakah ramngaw siam belh zel a ṭul thu a sawi. Sorkarin hâlpuah leh hâlmawi a khapna thupek chu zawm ṭheuh turin mi tin a ngen bawk.

Maintenance of Forest Fund 2023-24 sum cheng nuai 44 hmanga sak a ni a; Botanical Garden, Zotlang hmun hluia Interpretation Center chu Maintenance of Forest 2023-24 sum nuai 40 hmanga sak a ni. Hawnna inkhawm hi Champhai Bethel Venga EFCC Complex-ah principal chief conservator of forest (PCCF) AK Biswal-in a kaihruai a ni.