KHAWTHLIR

Thisen pe

December 14, Inrinni khan KṬP, Nursery Veng Bial-in ZMC tan thisen unit 45 an pe a, petute mipa 39 leh hmeichhia paruk an ni a; KṬP, Chanmari West Branch pawhin Synod Hospital tan thisen unit 41 pein, petute mipa 37 leh hmeichhia pali an ni. Inrinni vêk khan Adventist Youth Federation, Lunglei chuan Lunglei Civil Hospital blood bank-ah thisen unit 18 an pe a, petute mipa 17 leh hmeichhia pakhat an ni.

MHIP-in puan pe

MHIP, Armed Veng Branch chuan Zoram Medical College, Civil Hospital Aizawl leh Synod Hospital hnenah puan 100 ṭheuh an pe. Puante hi khualkhua aṭanga damdawi-ina awmte zinga thi, khuhna tur puan nei lo an awma hman tura ruahman a ni.

Ralthuam entirna

20 Battalion Border Security Force (BSF) chuan December 13, 2024 khan Lunglei Zotlanga an Battalion Headquarters-ah 2nd Mizo Battalion National Cadet Corps (NCC) hnuaia NCC cadet-te tan ralthuam chi hrang hrang entirna, Weapon Exhibition an buatsaih. Exhibition hi NCC cadet 150 velin an chhim a, ralthuam chungchang bakah, ramri venhimna leh ram chhung ralmuanna atana BSF hnathawh dante an hrilhfiah a ni.

Ruang chhar

Nimin zing dar 7:30 vel khan Lalsiamthari (44) w/o Thangchungnunga, Zemabawk, Lunglei road chu Ṭhuampui Venglai Presbyterian rama bûktê chhungah thia hmuh a ni. Thu dawn danin, Lalsiamthari taksa lang theiah hliam hnuhma hmuh a ni lo a, damdawi-ina endik a nih hnuah an in panpui a ni. Police chuan thih dan pangngai loa thi (unnatural death) thubuai an ziak lut.

Larsap leh Bishop

Governor Dr Hari Babu Kambhampati chuan December 13, 2024 khan Krismas leh kum thar thleng tur pualin Aizawl bishop Most Reverend Stephen Rotluanga chu a chenna Bishop House, Ramthar Veng, Aizawlah a tlawh. Larsap chuan, zirna leh vantlang rawngbawlnaa Catholic kohhrante hmalakna fakawm a tih thu sawiin, mipui tana an rawngbawlnate chhawm nung zel se a duh thu a sawi.