Olympic 2036-ah Mizo ṭhalaite an tel theih nan sorkarin hma a la - CM

Chief minister Lalduhoma chuan December 14, 2024 khan Thenzawla B Lalṭhuamliana leh Rohnuni Memorial Football Tournament khârna a hmanpui a, India-in Olympic 2036 thlen a tumah Mizoram sorkar pawhin Mizo ṭhalaite India aiawha an tel ve theih nan hma a lak thu a sawi.

CM Lalduhoma chuan, India ramin Olympic 2036 thlen a tumah Mizo ṭhalaite India aiawha an tel theih nan Mizoram sorkarin hma a lak mek thu sawiin, "Vision 2036 kan kalpui a, June 13, 2024 khan Baptist Centre-a Sport Conclave kan neihnaah ka puang. Sports minister Pu Tetea hoin Olympics discipline zinga kan lo inpuahchah ve theihna kawngah kan inpuahchah nasa dawn. Kan tum ber chu kan naupang, talent neite zawn chhuah a, training pek a, India aiawh thei tura chher a ni," a ti.

Chief Minister chuan, "Football hi khawvel ngaihhlut infiamna a nih avangin a thiamte tan eizawnna remchang a tam a, foreign leh India ram chhungah pawh hausakpuina tham hmun ṭha a tam. Mizo tlangval, ISL-a khel kan nei fur a, a hlawh ṭha zualte'n kar khatah Rs 2,00,000 vel an hlawh thei," a ti a; ISL khel pha lo tan pawh I-League a awm thu leh tih tak takna nena beite tan infiamnaah dinchhuahna a awm thu a sawi.

Lalduhoma chuan, Thenzawlah MLA fund leh fund dangte hmangin indoor volleyball stadium din an tum thu te, Thenzawl Zone FA-in football house an dil chu tih dan kawng an zawn dawn thute a sawi bawk.

Inelna hi minister of state B Lalchhanzova'n a nu leh pa hriatrengna atana a buatsaih a ni a; khârna inkhawm hi a hmanpui bakah, minister Lalrinpuii pawhin a telpui a ni.