Lawngtlaiah ruihhlo do inzirtirna hun hmang

Lawngtlai District Committee on Nasha Mukt Bharat Abhiyan bultumin December 13, 2024 khan Lawngtlai Chandmary Recreation Centre-ah 'Mega Awareness Campaign on Ruihho Do' buatsaih a ni a; adviser to chief minister Dr Lorrain Lalpekliana Chinzah, Lawngtlai East bialtu MLA-in a hmanpui.

Dr Lorrain Lalpekliana Chinzah chuan, Nasha Mukt Bharat Abhiyan-in a tum ber chu ruihhlo awm lohnaa India ram siam a nih thu a sawi a, "Narcotics Control Bureau (NCB), Social Justice department leh Health and Family Welfare department-te chu a sûlsutu lian tak an ni. Mizorama district 11 zingah Lawngtlai hi ruihhlo, ngawlvei leh HIV vei tamna ber zinga mi a ni a, hmalak a ngaihzia a tichiang hle," a ti.

Ruihhlo bâwih aṭanga tâl chhuah tumte chu theihtawp chhuah zel tura chahin Dr Lorrain Lalpekliana chuan, "Bànsan tura harsatna an tâwkte ṭanpui turin sorkar leh NGO an awm. CYLA-in Drugs Reduction Squad an din hi a lawmawm a, sorkar nen thawhhona ṭha nei zel se ka duh," a ti a, sorkarin a puih zel dawn thu a sawi.

Lawngtlai DC Cheemala Siva Gopal Reddy, SP Lokeshwaran R, additional DC Zoramsiama Hmar leh CYLA general secretary JH Lalrindika te pawhin thu an sawi a; kalkhawmte chuan ruihhlo ti lo tura intiamna an sawi rual a ni. Lawngtlai Higher Secondary School, Don Bosco School, DEO Pipe Band leh MzSRLM, Lawngtlai RD Block-ten hun an hmang bawk.