Mi 294-te puantah in sakna tur pe

Lunglei District High Powered Committee (HPC) vice chairman V Malsawmtluanga, Lunglei North bialtu MLA chuan December 14, Inrinni khan Mualṭhuam North community hall-ah National Handloom Development Programme (NHDP) hnuaia Small Cluster Development Programme (SCDP) kaltlangin Mualṭhuam N' leh Kanghmun South khuaa mi 294 hnenah puantahna in sakna tur Rs 1,20,000 ṭheuh a hlan.

V Malsawmtluanga chuan, sorkar laipui aṭanga khua leh tuite hamṭhatna tur ruahmanna kalpui ṭhinah a dawngtute'n an hman dik tâwk loh avangin dawn leh turah harsatna tâwk an awm ṭhin tih a sawi a, "Puantah in sakna dawngtute'n rintlak leh belhchian tlakin in sum hmuhte hmang u la, khaw dangte tana entawn tlak, model khua ni ngei turin ṭhahnem ngai takin hma la ang che u," a ti.

Commerce & Industries director Maria CT Zuali pawhin thu sawiin, chakna leh theihna ngah zawk Mizo mipate'n puantah luh chilh se a duh thu a sawi a; mahni kutchhuak leh kutkawih ngeia Mizorama intodelh theih nan kawng hrang hrangah ṭhahnemngai taka hmalak a ṭul thu a sawi bawk.

NHDP hnuaia puantah in sakna tur ṭanpuina hi Mualṭhuam N' khuaa mi 173 leh Kanghmun S' khuaa mi 121 hnenah pek a ni a; sum sem inkhawm hi Mualṭhuam N' VC vice president V Lalramzauva'n a kaihruai a ni.