MLA-in a bialah thilpek a sem

Hrangturzo bialtu MLA Lalmuanpuia Punte chuan December 9-13, 2024 chhung khan a bial chhunga khaw hrang hrangah Krismas thilpek leh thilpek dangte a sem.

Lalmuanpuia Punte hian a biala khaw hrang hrangah kum 80 chin chung lamte hnenah Krismas thilpek atan puannuam a pe a; Biate, East Lungdar leh North Vanlaiphai khuate hnenah phûl sâmna tur khawl (manual grass/lawn mower) a pe a, Leng leh Piler khuate hnenah futsal ground-a phah tur phûllem a pek bakah, Leng khaw thîrdéng hnenah pûm a pe a ni.

Hrangturzo MLA hian December 12 khan Sailulak High School silver jubilee lawmna leh N Mualcheng Middle School golden jubilee lawmna a hmanpui a; thu sawiin, "Rim taka thawktute tan chuan kawng engkimah hlawhtlinna a awm a, ram danga hna thawka kalte pawh hi ram danga an thawh rim ang hian Mizoramah thawk rim se, an hlawhtling em em ang," a ti.

Lalmuanpuia Punte hian East Lungdar H/S, M/S I & II leh, P/S-I te a tlawh bawk a; sikul hotute'n an mamawh an lo thlente chu tihhlawhtlin a nih theih nan School Education Minister hnenah theihtawp chhuahsak a tum thu a sawi.