Ruihhlo kan do loh chuan kan tlâwm tihna a ni a, min hneh dawn - END Minister

Excise & Narcotics minister Lalnghinglova Hmar hoin December 14, Inrinni khan Lungleia sorkar hotu te, kohhran, tlawmngai pawl leh MJA hruaitute'n Lunglei district-a ruihhlo do dan an thlirho. Minister chuan, "Ruihhlo hi kan do loh chuan kan tlâwm tawh tihna a ni a, kan do loh chuan min hneh dawn," a ti.

Lalnghinglova Hmar chuan, Mizorama ruihhlo hluar zel ṭangrual lehzuala do dan tur ngaihtuah tura ṭhukhawm an nih thu a sawi a, "Ruihhlo tirêm tura ṭan lak te, a ti mekte'n an simna tura hmalak leh la ti ve lote ven an nih theihna turtein thâ thlah loa theihtawp chhuah reng a ṭul. Ruihhlo hi kan beih loh chuan kan tlâwm tawh tihna a ni a, kan do loh chuan min hneh dawn a ni," a ti a, ram chhanna thil a nih avangin tih tak takna nena beih a ṭul thu a sawi.

Ruihhlo donaah chhungkua ṭan rual a pawimawh tih sawiin Minister chuan, "Sorkarin ruihhlo do a ngaih pawimawh avangin END pawh a thuam chak mek a, Saitual, Khawzawl leh Hnahthialahte Excise station thar hawn a ni a, lirthei 18 - ke pali nei 14 leh ke pahnih nei pali lei belh turin ruahman a ni. Thawktu sub-inspector pasarih lak a ni tawh a, inspector, sub-inspector, assistant sub-inspector leh constable-te lak belh turin ruahmanna a awm," a ti.

END Minister chuan ruihhlo donaa theihtawp chhuah zel turin kal khawmte a chah a, "Sorkar, NGO, kohhran leh khawtlangin mahni hmazawnah kan thiam dan danin ruihhlo chu kan do ṭheuh a, sâwt zawka kan do theih nan kan hmalakna inhriat tawnpui a ṭul a ni," a ti a; NGO leh kohhrante nen awmze nei zawka thawhho zel dan tur sorkarin a ngai pawimawh tih a sawi.

Ṭhutkhawm kaihruaitu Lunglei bawrhsap Navneet Mann chuan, Lunglei district administration aṭanga ruihhlo donaa hmalaknate a sawi a; khaw tinah ruihhlo donaa hma la tur village task force din mek a nih thu leh January 2025-ah chuan khaw tinah an din hman an beisei thu a tarlang.

END commissioner Z Lalhmangaiha leh Lunglei SP J Lalmuankima bakah, Lunglei Municipal Council councillor te, District Education Officer te, Lunglei Sub-Headquarters YMA hruaitu te, kohhran hrang hrang aiawhte leh MJA aiawhte'n thu an sawi bawk.

Ṭhutkhawmah hian Lunglei district-a ruihhlo ngai leh a zuarte dinhmun bakah, ruihhlo hluar zel lohna tura hmalakna kal mek leh hmachhawpte sawiho a ni a; ṭan lak ngaihna lai leh thawhho zel dan turte an rel a ni.

Excise & Narcotics Minister hian YMA Sub-Headquarters, Lunglei Anti-Drug Squad hnenah ruihhlo donaa an hmalakna atan Rs 10,000 a hlan nghal a ni.