MNF MDC pangate'n ZPM an zawm; Sorkar siam tumin Larsap an hmu dawn

Chakma Autonomous District Council (CADC)-a member of district council (MDC) panga chuan ZPM party an zawm a, December 14, Inrinni khan ZPM president Lalliansawta'n a lawm lut. ZPM MDC-te chuan sorkar an siam theih nan vawiin hian Governor hmuh an tum.

CADC-a MNF sorkar, chief executive member (CEM) Rashik Mohan Chakma kaihhruai chu December 11, 2024 CADC session no confidence Motion hmangin paih a ni a; MNF MDC zinga panga chuan ZPM an zawm zui a, MNF MDC dang pariat chuan BJP an zawm bawk.

ZPM thuchhuah chuan, "Anmahni duhthlanna ngeia ZPM zawm duhin Aizawl an rawn pan a, December 14, Inrinni chhun dar 12 khan ZPM Gen. Hqrs Office-ah ZPM rawn zawm thar MDC pangate chu ZPM president Pu Lalliansawta'n ZPM party-ah a lawm lut a ni," a ti.

Thlan tlin MDC 20 awmna CADC-ah hian ZPM chuan MDC 10 an nei ta a, BJP-in pakua an nei a, MDC 14 neia sorkarna siam ṭhin MNF chuan MDC pakhat chiah an nei ta a ni.

ZPM chuan, "Kalphung thar, mipui sorkar chuan ADC area-a party dang sorkar lai ṭhiah tumin sorkar chakna nen hmalakna a nei ngai lo a, chutih laiin, anmahni duh thu ngeia ZPM rawn zawmte erawh chu lawm takin a lo pawm thung," an ti.

ZPM tarlan danin, ZPM chu CADC-ah MDC ngah ber a nih tâk avangin hian CADC-ah sorkarna siam tumin an MDC 10-te chuan vawiin hian Governor hmuh an tum a ni.

MDC panga lawm luhna inkhawmah hian District Council & Minority Affairs minister C Lalsawivunga chuan thu sawiin, CADC-a MDC pangate'n anmahni duhthlannaa ZPM zawmtute chu CADC mipui tan leh Mizoram tan hmasawnna tluantling thlentu ni turin duhsakna a hlan.