International Paragliding Accuracy Championship tluang taka zawh a ni

Serchhipa International Paragliding Accuracy Championship & Air Sports Festival chu tluang taka zawh a ni a; December 14, Inrinni khan Serchhip Zawlpuiah khar niin, chief minister Lalduhoma leh Tourism minister Lalrinpuii ten an hmanpui.

International Paragliding Accuracy Championship-ah hian ram paruk - India, Korea, Kazakhstan, Spain, Indonesia, leh Nepal aṭangin pilot 30 an tel a; pakhatnain Rs 2,00,000, pahnihnain Rs 1,50,000 leh pathumnain Rs 1,00,000 ṭheuh an dawng.

Chief Minister chuan, infiammite tumruhna leh inpekna fakawm a tih thu a sawi a, "Ram dangte nena inpawhna leh inṭhian ṭhatna siamna kawngah he hun hi a pawimawh. Serchhip boruak muanawm, mawi leh hmuhnawm takah paragliding atana hmun ṭha tak a awm hi a lawmawm a, he lai hmun hi India rama adventure sports atana hmun ṭha ber pawl a nih avangin adventure tourism hmasawnna atana hmun pawimawh a ni," a ti. Mizo paragliding pilot-te thawhrimna lawmawm a tih thu leh a chhuan thu a sawi bawk.

Tourism minister Lalrinpuii chuan, adventure tourism-a tui leh hmanghria Chief Minister an nei chu an vanneih thu sawiin, "A zarah vawiinah a bial chhung ngeiah khawvel huap inelna Mizoramin kan thleng thei a ni," a ti a;, ram dang aṭanga telte chungah lawmthu sawiin, an rama an haw leh hunah Mizoram hre reng turin a chah.

International Paragliding Accuracy Championship khârna inkhawmah hian Tourism secretary Dr Lalrozama, Serchhip DC Paul L Khuma, Federation Aeronautique Internationale (FAI) Meet director Fari Botol, FAI, Aero Club of India leh Mizoram Aero-Sports Association hruaitute an tel a; pilot tiṭhate hnenah lawmman sem a ni.