Kuminah RTI zawhna 9,207 a lut tawh; RTI Online la zawm lo office 184 an awm

Kumin January 1 - December 12, 2024 chhung khan Mizorama sorkar department leh an hnuaia pêng hrang hrangin Right to Information (RTI) Act, 2005 tlawhchhanin zawhna 9,207 an dawng tawh. Hetih lai hian, RTI Online-a la inziak lut lo sorkar office/SPIO 184 an la awm.

Mizoram Information Commission (MIC) hotute hnen aṭanga Vanglaini thu dawn danin, kuminah January 1 aṭanga December 12 thleng khan offline leh online kaltlangin sorkar department/office hrang hrangin RTI Act hmanga zawhna 9,207 an dawng tawh. Zawhna 9,207 zinga 7,707 chu online kaltlanga zawhna a ni a, a dang 1,500 chu offline (hard copy)-a zawhna lut a ni.

MIC hotute chuan, RTI Act kaltlanga zawhna luh dan thlirin, mipuiin RTI Online an hmang ṭangkai tih a lan thu leh lawmawm an tih thu an sawi a, "GAD chuan kum 2022 July thla khan sorkar department/office-te chu RTI Online-ah SPIO/ASPIO in register vek turin a hriattir a, mahse, tun thlenga la in register lo sorkar office 184 an la awm," an ti.

RTI Online-a la inziak lut lo sorkar office enkawltu department 22 hotute chu vawiin Thawhṭanni leh naktuk Thawhlehni hian an ko khawm dawn tih sawiin MIC hotute chuan, "An la in register loh chhan leh harsatnate kan sawipui dawn," an ti. An la inziah luh loh chhan chu department-te'n an ngaihsak tâwk loh vang ni thei tho mah se, thawktu indaih loh vang pawh a nih theih thu an sawi bawk.