Jordan Centre enkawl duh la hmu lo

Social Welfare & Tribal Affairs (SWTA) department chuan ruihhlo ngaite enkawlna hmun Jordan Centre, Seṭhawn enkawl duh nimin thleng khan an la hmu lo.

SWTA department hian Jordan Centre enkawl duh zawnna invitation of expression (IoE) chu November 2024 tàwp lam khan an tichhuak a; mahse, nimin thleng khan chhângtu an la awm lo. IoE chhàn theih hun hi December 19, 2024 tlai dar 4 thleng hawn a ni a, chhànna lutte chu December 20, 2024-ah hawn tum a ni.

Vanglaini palai zawhna chhangin SWTA Directorate leh Secretariat hotute chuan, IoE chhangtu an la awm loh thu an sawi.

June 18, 2024-a Council of Ministers ṭhukhawm chuan Jordan Centre chu mi dang kuta hlan a remti a, chumi bawhzui chuan SWTA department-in IoE an chhuah a ni.

SWTA-in a ruahman dan chuan, Jordan Centre enkawl duh an awm a, an enkawl tum dan pawmsak a nih chuan kum 5 chhung atana enkawltir phawt tur a ni a; kum 5 a zawh hnuah ennawn leh a ni ang.

Enkawl duh an awm chuan Jordan Centre-ah hian mi 60-80 inkar enkawl tura beisei an ni a; Centre-a awmte aṭangin a enkawltute'n fee an lak remtih a ni a, fee zat erawh SWTA-in a pawmpui a ngai dawn thung.