OMB hmangin cheng vbc. 140 pûk dawn

Mizoram sorkar chuan Open Market Borrowing (OMB) hmangin loan cheng vbc. 140 a pûk leh dawn. Sorkar kum kal mek 2024-25 chhunga a pûk ṭum riatna tur a ni a, OMB hmangin cheng nuai 812 a pûkna tur a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui a; OMB hmanga Mizoram sorkarin sum pûk tur a zawn thu December 13, 2024 khan RBI-in a tichhuak.

Mizoram sorkarin OMB hmanga sum a pûk theih nan RBI chuan sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chu RBI chuan December 17, 2024-ah tihfel hman beisei a ni.

OMB hmanga sum pûk chu kum khatah a pung vawi hniha rulh tur a ni a, kum 10-15 vel chhungin sum pûk zawng zawng rulh tlâk a ngai a, a punna 7-8% vel a ni. OMB hmanga sum pûk hi a hun taka rulh a ngai a, rulh hunah chuan RBI state sorkar account aṭangin a cut mai ṭhin.

Sorkar sum kum kal mekah Mizoram sorkarin OMB hmanga sum a pûk tur zat ruahman chu cheng vbc. 1,170 a ni a; sorkar kum liam ta 2023-24 khan cheng vbc. 1,200 pûk tura ruahman niin, kum kal meka sum pûk tura ruahman hi 2023-24 aiin cheng vbc. 30-in a tlem zawk a ni.

SORKARIN OMB HMANGA SUM A PÛK TAWH DAN

May 2024 - vbc. 200

June 2024 - vbc. 71

July 2024 - vbc. 90

August 2024 - vbc. 90

September 2024 - vbc. 90

October 2024 - vbc. 50

November 2024 - vbc. 80