Tun ṭhál chhungin kawng siam hna zualpui thawh hman tum

Public Works department (PWD) minister Vanlalhlana chuan, tun ṭhál chhungin kawng siam hna zualpui thawh zawh hman tum a nih thu a sawi a, "Theihtawp kan chhuah mek," a ti.

Vanglaini palai zawhna chhangin Vanlalhlana chuan, Cyclone Remal vangin duh angin kawng an siam hma thei lo tih a sawi a, "Cyclone Remal thlen hmaa estimate siam tawh tam tak a awm a, cyclone vang hian estimate siam lai aiin kawng a chhiat daih tawh avangin a buaithlak hle," a ti a, contractor-te pawh an buai phah thu a sawi.

PWD Minister chuan, kawng siam hna ngawrh taka thawh a nih thu sawiin, "Tun ṭhâl chhung hian a zualpui siam hna chu thawh kan tum. Aizawl mai bakah khaw kar kawng hrangte pawh a theih anga tam siam tum a ni," a ti.

Aizawl-Thenzawl-Lunglei kawng siamtute'n court-a an khinnaah sorkar a chak tih sawiin Vanlalhlana chuan, "An sum eng emaw zat a la awm a, chumi hmang chuan Aizawl-Thenzawl-Lunglei kawng siam hna thawh a ni ang," a ti a, a ṭul angin hmun dang siamna atan pawh hman a nih tur thu a sawi.

PWD Minister chuan, Bawng­­­kawn kawng siam zawh tâk anga Aizawl khawpui chhung main road-te siam tum a nih thu sawiin, "Aizawl kawngte hi an upa ve deuh tawh a, Bawngkawn kan siam tâk ang veka siam tum a ni. Rua­hmanna siam mek a ni a, sorkar­ah pawisa dil leh niin, kan hmuh ngei kan beisei," a ti.

Vanlalhlana chuan, tuialhthei aṭanga kawng siamna atana Road Maintenance Cess an lak chu a ṭangkai thu sawiin, "Pawisa awm sa bakah cess tling khawmte hi kawng siamna atan hman mek zel a ni," a ti a; cess tling khawm chu mipuite'n kawng ṭha an neih theihna atan ṭangkai taka hman zel tum a nih thu a sawi.

PWD Minister sawi danin, Vairengte leh Sairang inkar NH kawngah NHIDCL-in an la lak loh package hnih a awm a, sorkarin NHIDCL laktir vek a tum. NHIDCL-in a ṭhen lai an lak a, a ṭhen an lak loh chuan hnathawh a tibuaithlak a ni. NHIDCL-in an la lâk lohte chu PWD-in a theih ang angin an thawm ṭha a ni.